Sombah Nasi Merupakan salah satu tradisi Rakyat Kuantan, Tradisi Sombah Nasi ini biasanya dilakukan disaat acara perkawinan, pada saat kedua mempelai diarak oleh Pihak Bako ( Rombongan Suku Ayah ), Pihak Pengantin Perempuan akan menjemput Pihak Pengantin Laki-laki kerumahnya, setelah itu Kedua Mempelai diarak kerumah pengantin Perempuan, setelah Pihak Pengantin Perempuan Mempersilahkan Rombongan Mamak Pihak Pengantin laki-laki masuk, disitulah acara Sombah Nasi dilakukan sekaligus Pemberian Gelar untuk Pengantin Laki-laki. dimana Gelar merupakan panggilan setelah menikah bagi laki-laki di daerah Kuantan.
Sombah nasi disebut juga sebagai kata-kata persembahan, disebut Sombah Nasi karena Persembahan itu dilakukan didepan Nasi yang telah dihidangkan oleh Pihak Pengantin Perempuan, sebelum acara makan maka dilakukan lah persembahan itu.
Baiklah.. untuk Melihat seperti apa Kata-kata persembahan itu, Penulis Mengambil di salah satu sumber, yakni sebuah Suku yang berada di daerah Kenegerian Simandolak, Namun kata-kata ini bukanlah sebuah kata-kata mutlak, tapi tergantung lawan persembahannya..

Pertama ( Laki-laki )

Assalamu’alaikum ., Alaikum salam kan jawabnyo. Sapihak dek kami ko nan datang, nan sararak langkah dari rumah, nan sarayun lenggang di nan golong manuju ronah kampuang nangko.
Kampuang nan indak katinggian, dipagar bukik bukuliliang, disolo gunung tungku tigo, tigo nan cukuik sajorangan.
Batang karambial linggayuran, rumpuiknyo gatial-gatialan, sawah bapiriang dinan datar, ladang bapetak dinan lereng, cindo dusun batumpak-tumpak.

Maijau rono parolak mudo, jaguang maupiah bilang tangkai, bak tima bungo ladonyo.
Buah toruang ayun-ayunan, solo manyolo kacang panjang, mantimun mangarang buah. Mako kami turuikkanlah jalan nan panjang,   jalan rayo titian batu, lobuah godang cindai tajelo. Lobuah godang cindai tajelo, kosiaknyo mipi bak di pipi, pasirnyo alui bak ditinting, batu bulek susun basusun.
Pagar iduik baliak batimbal, pudiang ome sabolah luarpudiag itam sabola dalam, jiluang babatang-batang mambelok lalu kahalaman.Halaman nan indak lowe amek, malayah bungo saliguri, marumbai bungo tali-tali, bungo hujau sapajangkauan, tobik karono rondah-rondah.
Mako babunyilah bunyi-bunyian, maringik sibolang tandai, bakukuak kinantan suci, marentak balam bungo sawah.Talengong kadalam parolak, cabodak lalaian boruak, kamuniang sandaran alu, limau mani pantan kudu. Tobek nan bunta bakiambang, airnyo joniah ikannyo jinak, kulari babondong-bondong, bada sopek basiku-siku, bada puyu baridai ome, jariang malinte-linte juo.
Salorong nan dari pado itu, pihak dek kami ko nan datang. Nan bak samisal buruang bondong, tarobang sakawan diudaro, babegar dirimbo nan satumpak, maraok dikayu rimbun daun tatogon malihek rantiang, nyo kok indak iko tompek inggoknyo.

Lai kok iko tompek inggok nyo ?
Kinari bukan kinari sajo
Tumbuah sikojuik di ilalang
Kamari bukan kamari sajo
Godang makosuik nan dijalang

Bodial Jopun di Bangkahulu
Panembak kapal di Muaro
Bari ampun ambo dek pangulu
Sambuiklah salam dek juaro

Adokok jauh nan kan dinaanti atau kok dokek nan kan diimbau. Bialangan ala cukuik Langgaian lah datar. Sekian pertanyaan dari ambo.

Pertama (Perempuan)

Sapanjang Pahobaran Rky tadi  la susunan adat jo limbago. Kalau adat ado batangkai, pusako ado batampuak, kok undang ado batali, mangobek undang jo sakato, mangobek kato jo mufokat, itulah bonar nan dituruik.
Manolah tadi Rky batanyo, adokah jauh nan kan dinanti, dokek nan kan diimbau, kok bilangan la gonok langgaian la datar.
Jauh nan kan dinanti, dokek nan kan diimbauiyolah marapulai, niniak mamak, saroto urang nan banyak. Kinilah taduduak dirumah iko, bilangan lagonok, langgaian lah datar mujur batimpo di nan elok, tuah la lokek di nan mulio usahlah ragu tontang itu.
Sakironyo ado kato sapatah nan kan dosobuik, rundiang sabuah nan kan tongah nan taobik di badan diri Rky. Kok titiak labuliah kami tampuang, maleleh la bisa kami palik kok bajalan labuliah diansuar kami manunggu tontang itu.

 Laki-laki (2)

Mano Rky…!
Sombah sa ujud dengan simpuh, saborek bungka nan piawai naroco lurui main daun. Indak basibak jo basisih bukan bahinggo jo babate.
Sombah kapado ninik mamak nan godang bosar batuah nan bapucuak sabonar bulek, baurek sabonar tunggang, dinjuang tinggi diambal godang, sondi andiko dalam kampuang, tampuak jo tangkai di nagori.
Nan Ibarat Kayu godang ditongah koto :
Baurek Limbago motan, babatang sondi andiko, badahan cupak jo gantang, barantiang bari jo balabe, badaun rimbun dek adat, babungo mungkin jo patuik, babuah kato nan bonar.
Buliah baselo diureknyo, dapek basandar dibatangnyo, tinggi manunggawi, godang malindungi kan gantungan cupak nan duo. Partamo cupak Usali kaduo cupak buatan.
Sampai kapado imam kotik, bilal maulana jo tuak ongku, tahu dihalal dengan haramsatoto syah dengan batal, suluh bendang adat limbago.

Hulu balang jo ompang limo, jo monti pagawai adat, parik dalam pagaran kokoh.
Codiak jo tahu pandai, nan arif bijaksana, tahu diangin nan basiku, tahu diombak nan basabuang, saroto dahan kan maimpok atau kok rantiang nan kan mancucuak. Tahu diujung  kato sampai, olun bakilek labakalam bulan la longkap tigo puluah. Takilek iken dalam air, ikan takilek jalo tibo la tontu jantan batino nyo.
Saroto di nan mudo pambimbiang dunia, nan copek kaki ringan tangan, copek kaki indak panaruang, ringan tangan indak pamocah. Oso tarontang duo sudah, hatinyo suci bamuko joniah, tahu jo malu dengan sopansaroto raso jo pariso
Toruih pulo kabundo kanduang, limpope rumah nan godang, sumarak didalam kampuang, hiasan dalam nagori. Kok iduik tompek banasar, mati tompek baniat, kan unduang-unduang ka madinah, kan payuang panji kasirugo.

Amban puruak aluang bunian urang nan duduak jo sukatan.
Kalilawar dipulau rimbang
Anak ruso mati ta dobia
Kok gawal mintak ditimbang
Kok doso ampun nan lobiah

Bukan tambilang manggulapai
Tambilang panggali pakuburan
Bukan mambilang tando pandai
Mambilang untuak dipasombahkan
Dipanggang-panggang digotok

Dikirai-kirai dibakar
Tatangguak ikan gulamo
Dibilang-bilang di otok
Dicurai-curai dipapar
Dikombang ditombo lamo

Tatikalo maso dahulu, samusim maso saisuak, katiko langik basentak naik, bumi basentak turun, lawik sacampak jalo, tanah darek bolunlah lebar nan timbul gunung marapi.
Lorong di ninik moyang kito asal usul kalau dikaji didalam sitombo lamo sopiah bolahan tigo jurai ka banua ruhum banamo maharajo alif, sajurai kab bandar cino banamo Mharajo Dipang, sajurai kapulau ome nangko maharajo di rajo.
Pihak disutan maharajo dirajo taniat didalam hati tacinto didalam kiro-kiro, balayiar enyo maso itudiate dondang nan sabuah cukuik jo coti bilang pandai.
Dek lamo dondang balayir didalam lawik baharullah tampak lah api takijok-kijok. Gunung suatu maso itu diate puncak langgapuri banamo gunuang marapi.
Senen sidangkak nan badangkang, saroto buayo putiah daguak, dibukik pata patigo banamo bukik siguntang-guntang.

Dimano titiak palito
Dibaliak selong nan batali
Dari mano turun niniak kito
Io dipucuak gunuang marapi

Basentak turun kabawah la tibo diguguak ompang, senen ligundi nan baselo, senen bulo bataratak sabolun bakorong dengan kampuang, sabolun bakato jo nagori, maso badetar-detar upiah  maso bacawan panarahan. Dek lamo alam baputar urang batambah bakombang juo, kamanakan batambah banyak. Mako dibueklah sawah jo ladang makanan urang tigo luhak. Manolah luhak nan tigo, nantuo luhak tanah datar, nan tongah luhak agam nan bonsu luhak limo puluh.
Dibuek adat dikarang undang disusun tangkai ciek-ciek dibuhal dikobek arek dipokukan katiang panjang. Manurut bari balabe adat salilik gunuang marapi, saedaran gunuang pasaman, sajajaran sago jo singgalang saputaran Talang jo Kurinci. Dari sirangkak nan badangkang, hinggo buayo putiah daguak, sampai kapintu rajo hilir durian ditakuah rajo. Sapisak sapisau anyuik, sialang balantah bosi, hinggo air babaliak mudiak sampai ka ombak nan badobuar. Sailiaran batang sakilang, hinggo lawik nan sadidikrao jo mapak tunggul gunung nan malintang. Pasisir bandar sapuluah hinggo taratak air hitam sampai katanjuang samalidu pucuak jambi sambilan lurah

Jikok dikombang salebar alam
Jikok dibalun sabalun kuku
Tontang iko basudah kalam
Sombah sahinggo io dahulu
Tungkek galah ome dirajo
Sitobal dibaliak papan
Kok salah tobatlah ambo
Bonar samo diamalkan

Barabah sadundun jo balam
Jikok katobek barulang mandi
Sombah sasusun dengan salam
Kok kato nan mintak diburusi

Perempuan (2)

Mandongar pasombahan Rky tako ;
Gamontar sagalo batang tubuh, bakipe poluh kadado, bakojar darah kamuko, apo sobab dek baitu :
Madok kek diri ambo ; ibarat biduak kociak jolong sudah, kalongkapan bolunlah cukuik, baayir ditopi-topi. Katonagh takuik dek galombang, ka pulau garik dek buayo, lokek patuah Rky juo :

Baburu kapadang datar
Dapek ruso bolang kaki
Dihalau katongah padang
Baguru kapalang ajar
Baru baguru guru la mati
Disilau surek surek lah ilang

Baguncang bumi  jo langik, barombak lawik sailan, bakumpul karang katopi, kok karam ambo tontang itu.
Akan tetapi setelah ditimbang makna kato, disilau makna ragi, nyatolah : nan kato wajib dijawab, gayung wajib disambuik. Mano Rky
Mintak ampun kabaisi rumah iko dan dibate dinding nan rencong, ditani rusuak nan lomah, nan disungkuik atok  nan  lebar.
Ninik mamak nan godang bosar batuah, urek tunggang pucuak nan bulek dinagori. Dahan rampak daun nan rimbundipusako, putiak lobek buah nan ranum makanan urang saalamnyo.
a.   Imam kotik : palito nan indak kunjuang padam, suluah nyalo maso didunia bendangnyo sampai ka akhirat, nan duduaknyo bacaromin kitab, togaknyo rintang nan pituah
b.   Codiak pandai : urang nan arif cindo kio, pandai maagak magiahkan, kok runciang indak mancucuak, tajam  nyo idak maluko, pasak kungkung kunci nan toguah sumarak kato jo nagori.

Pisau sirawik ulu sonsang
Saruang nyo tore kayu jati
Ulunyo pangkal batang tomat
Diambiak paracik buah
Takuik gontar ambo mambilang
Pangulu bayak nan sati
Tuak ongku banyak nan kiramat
Rang godang banyak nan batuah

Tatikalo pulai pangkal naik, katiko manusio pangkek turun. Pulai bapangkek naik, maninggalkan rue dengan buku, manusio bapangkek turun maninggalkan adat jo pusako. Adat jo pusako bakul ayat nan indak abi, basangketo nan indak sudah, kok putuih tali dihadapan tali bauk kabalakang, kok putui tali kabalakang, tali bauk kahadapan. Itulah bakul ayat abi basangketo sudah. Loma ambal-ambal, cunduang tungkek manungkek, baitu adat iduik dalam nagori.
Supayo dapek dituruik rantau ditingkek tobiang rantau dituruik dengan undang, tobiang ditingkek dengan jonji.
Rantau nan kurang oso duo puluh, duo puluh dengan muaro.
Dikarak nan manyerong di onau nan baduri. Gantang nan baratui gonok cupak nan duo bole tail.

               Siak nagori bakorek kuku
               Dikorek dengan sarawik
               Sarawik pambola botuang tuo
               Botuang tuo ambikkan lantai

                           Sajak nagori parompek suku
                           Tiap suku buri baporuik
                           Banjar diagia batuo
                           Rumah dibori batangganai

Lobua dibori baradat, topian dibori babaso, kato dirambah dengan kato jo mupokat. Lalu kabalai jo dubalang, tompek maotok-otok sombah, boke mambilang-bilang pandai
Balai batiang tore Jilatang, nan baparan diakar lundang, basondi garoman gajah. Gondang bagotong jangek tumo. Tabuah bagual ikur moncik. Anak adam 99, nan go manjadi jihin dengan setan, nan 9 manjadi anak cucu adam.
Kan apo guno anak cucu adam, untuk panurunkan lancang nan kuniang. Kan apo guno lancang nan kuniang untuk panuruik rantau nan duo tigo jurai.
Manolah rantau nan duo tigo jurai, partamo rantau kuantan, kaduo rantau kampar, katigo rantau sibatang hari.

    Kuantan bukan bak kuantan kini, sungai korua dahulunyo. Jantan bukan panyogan bak jantan kini jantan paomua dahulunyo
    Kampar bukan bak kampar kini, sungai dore dahulunyo. Orang bukan pa lapar bak urang kini, orang babore dahulunyo.
    Batang hari bukan bak batang hari kini,  sungai jonia dahulunyo. Urang bukan pangari bak rang kini, urang barome dahulunyo. Ome baik tambang singingi, kalam diangkek lancang dibuang samaso ome bakirai digambuik. Jiko maso dahulunyo : Barumah ka pambatang, bapuyuh panjang dunguik, babalam tigo gayo, bakatitiran sayung dalam. Kobau pingitan bawa rumah, jawi balonguan tonga padang, marpatinyo linduang bulan jo matohari. Itik jo angso tonang dimaro. Kacang manjulai kabalango, pantau malumpek kasingkalan. Ome panjang panyontuang pintu, ome bulek palantiang anjiang, ome urai pangambu api, jiko maso dahulunyo. Baladang sabingkai tangguak salibunyo makan satahun pado maso dahulunyo juo. Maso kini indak kan basuo. Kini ibarat manetek niro pinang, bak untuang induak ayam mangoke baru makan, dapek pagi habi potang.

Tontang iko kini pihak kapado diri ambo, topeklah bak pituah urang juo, saibarat urang poi manyumpik. Dicari katiko baik, dipilih maso nan elok, dipadoman galah salapan lalu bajalan masuak hutan. Latibo dirimbo nan satumpak, dipandang hiliar jo mudiakdilihat kiri jo kanan, tampaklah siburuang nuri.
Inggok dikayu nan sabatang, sodang mangirai-ngirai sayoksodang malope-lopean payah. Lalu diambiak sumpitan godang saroto damak nan baipuh disumpik buruang ate dahan.
Satibo damak diate bagoluik jo bungo kombang, badundun jo buah ranum, babegar-begar jo awan. Mako samantaro buruang nak katangan, diwalakkan kato sakutiko, ponek nak jadi parontianpotang nak jadi pamalaman.

Pidato Sirih ( Penyerahan )

Talatak puntiang di ulu
Dibawah kumpalan tali
Asal mulo kato daulu
Tigo limbago nan tarjadi

Partamo sombah manyombah, kaduo sirih jo pinang, katigo baso jo basi. Sombah manyombah dalam adat, tali batali undang-undang, tasobuik dimuluik mani, tapakai dibaso baik.
Muluik mani calemong kato, basobuik gulo dibibir dalam cupak nan piawai banamo adat sopa santun. Adat dilawik bajuru mudi, adat disabuang bajuaro, adat diolek barajo jonang.
Kok dikaji tontang sijuru mudi, tahu diangin nan basiku, tahu diombak nan basabuang, pandai manjago pasang turun naik.
Kok dikaji tontang si juaro, tau dituah sisik ayam, tahu digulang nan bakicuah, pandai manadah tampin taruah. Kok dikaji tontang si rajo jonang, tahu dikereng dengan gendeng, tahu dicaka dengan kaik, pandai manjago lobiah dengan kurang.

Ramo-ramo tarobang malayang
Malayok kakoto tongah
Banyak nyo ompek puluh ompek
Endah carano bukan kapalang
Talatak ditongah-tongah
Dilingkuang urang nan rapek

Buruang si nurak buruang nuri
Sincirak ate pambatang
Sirih golak pinang manari
Malihek urang nan lah datang

Lorong kapado caranonyo :

Carano Banjar Reno Ali, buatan tukang koto godang, nan rimbun bungo kaliki, nan ranggak bungo kacubung, nan kunkun gagal kan inggok, nan lontiak olang bamain
Satahun dipanggang bugi, samusim dilinggar cino, usahkan ratok rongak pun tido. Pihak kapado songkok carano, dlamak urang namokan, tonun banamo Silang Suto, baukir babungo rampai, baturab ba bonang ome, baluki bakelok paku, ragi nan samo baliak bala.
Baratui caromin dipinggir, batabuar kaco ditongah, kilek kamilek cahayonyo, sarupo bintang ate langik, bintang gujarah bakuliliang.
    Pihak kapado nan sirihnyo :  Sirih udang tampak ari, tumpuaknyo bak kuku balam, gagangnyo bagai suaso, buah diambiak kan tanaman, batang diambiak kan tiruan. Setahun dalam panggilingan usahkan mosiak layuarpun tido
    Kononlah pado dipinangnyo : Pinang sierak ero mani, tumbuhnyo dikidal rumah, tingginyo panjek panjekkan, rondahnyo jangkau-jangkauan, pucuak malepai awan putiah, satahun tupai dek mamanjeklarang basuo jo buahnyo. Kok babuah sabijo duo, jatuahnyo bukan jatuah dek bapanjek, jatuah dek angin nen mandayu, kok tasipuak bolah ompek, kok tasipak jadi sopah, baitu kan lombuik pinang.
    Salorong pado digambirnyo :  gambir kuniang sarupo dadiah, buatan puti sari lomak, maninyo tinggal dilidah, koleknyo tinggal dikarongkongan, daun malayok kalawitan tibo dipulau batebaran
    Kok kunun di kapurnyo : Kapur putiah ombun bajano, dibasuah jo air bungo, dipati jo pati santan, dikipe jo ambai-ambai, dipalik jo jari mani, bakisar kajari tunjuak mambayang katapak tangan.
Sapalik sapuluh ome, sakodom sakati limo, harogo nan indak tarogoi, harogo satimbang jo nagori. Makanan anak rajo-rajo pamainan bibir puti-puti.
    Pihak kapado tambakaunyo : Tambakau alui ombun bajelo, bijinyo datang dari ruhum, pakirim sidayung dilawitan, dibaok anak Sutan Bentan, diracik anak Garagasi. Saeto panjang jaluarnyo, bajomuar dibilik dalam, bapantang mosiak dek pane, mosiak dek ombun tongah malam.

Tanam sirih tanamlah udang
Tanam karakok dihalaman
Cabiak sirih gotoklah pinang
Giliang lah rokok pamaianan tangan
Mudiakkan sawah dibondar
Hilirkan sawah taruko
Kok banyak bonar sirih dipasar
Sado iko dalam carano

Ayam putih tarobang batali
Dilurah mangko maraok
Batoluar dirumpun soriak
Anaknyo turun salapan
Makanlah sirih pinang kami
Bapapatah mako disingkok
Baibarat mako dicabiak
Sopahnyo bori bajunjungan

Pidato Sirih (Menerima)

Ruponyo sapanjang buah panitahan Rky nan tatabur kek nan banyak, nan talayang katongah-tongah, tatumpah kapado ambo. Didongar la rancak bumi, dipandang la rancak rupo, labuntar sawah nan sapiring, lamasak cindo padinyo. Tapi sungguhpun baitu dek padi indak satangkai, dek pipik indak saekor.
Dek padi indak satangkai masak nan indak sakali ambiak
Dek pipik bukan saekor tarobang nan indak sakali inggok
Mako kan ambo cubo marontang panjang, untuang taserakkan dijalo suto, kok untuang ikan nan buliah, kok indak ome tantangannyo.

               Sairing balam jo barobah
               Balam tarobang barobah mandi
               Sairing salam dengan sombah
               Salam datang sombah kambali

Kambali juo pado Rky. Mano : Rky

               Anak ayam pandai baronang
               Dapek kakinyo dek buayo
               Duduk Rky jo batonang
               Ambo kan mulai jo bicaro

Adopun sapanjang buah panitahan Rky tako, taserak nak ambo pilih, dipilih lalu dikampungkan. Kok anyuik nak ambo sonsong, disonsong lalu kahulunyo. Apokah jim pasombahan Rky.
Dek caranolah katongah sarek barisi kalongkapan, mako malihek diate rupo, basiang diate  tumbuh, tumbuh sarupo iko kini.
Sirih sacabiak mintak dikunyah, pinang sagayiang mintak digotok, dipipil gambir dipalik kapur dek kami kan iyo baitu.

               Takilek caromin diudarao
               Jatuah kalawik batu karang
               Hilang disembar dek buayo
               Dek bonar sombah nan tibo
               Lahir kapado ambo surang
               Batin kapado kami basamo
            
Katowari kato bajawek, kato pusako kan batuluang manuruik patatah jo patitih basuo pamainan adat.

               Batonun kulindan suto
               Sajalan ragi jo bonang

Suri dimano talataknyo

            Layang malayang sombah tibo
            Timpo batimpo solam datang
            Titah kaambo tahontaknyo

Kato tapogang kek pangulu, rundiang disimpan dinan banyak. Awal jo akhir kok sapokat, lahir jo batin kok sasuai, tibo digayuang nan kan manyambuik, kato nan kan manjawab topek diambo tarobiknyo. Sungguhpun diambo tarobiknyo, nyato adat bahati sungguh, nayato pusako bainggiran.
Bacupak talago ponuah, bagantang si Maharajo Lelo, undang-undang maisi kondak
Karono sobab dek baitu, kato iyo kato baturuik, kato indak kato mati, kato ontah kato tatogun. Dapeklah kato nan saiyo, kok bulek buliah digolekkan, picak dapek dilayangkan. Tibo kami dipabasokan, basapu laman nan sabidang, takuak pintu boke lalu, tabontang lapiak paradani, talatak sirih dicarano tando alamat putiah hati. Sonang bonar dalam hati, dek  malin indak tabacokan, dek tukang talukikan, Allah lah sajo nan kan tahu.
Nan sakarang iko kini, tontang dek kami kini, olah sa iyo la sa lope, la satanai salatakkan, salolah sakojar untuk manarimo sririh Rky.
Tapi sungguhpun baitu, adopun masak sirih ko tigo parakaro.

Partamo masak digagang, kaduo masak dimakan, katigo masak jo mupakat
Nan dikatokan masak digagang :
Rono kuniang mangarisik, tampuak layuar daun la kucuik, dek ulek indak talomakkan, dek somuik indak tajalari
Nyampang gugur manjalang tanah, jagan dicinto kanjunjuang lai, tampan kan jadi sarok sajo, dakak nan saka sirih masa
Tasobuik masak dimakan :
Sodang tampuak lai bagotah, maso daun lai baminyak, gilo dikijok pinang mudo, dirayu kapur jo gambir bararak lalu bacarano. Diupam manjadi satu, dikunyah bamerah bibir, kaleknyo tinggal dikarongkongan, sarinyo naik ka paroman
Kok dikatokan masak jo mufakat ;
Olun dilihat la tapandang, la ole bangun rawiknyo. Olun dikicok lataraso, lanyato lomak maninyo.
Salorong Sirih Rky nan katongah, nyato bukan masak digagang, tapi indak pulo masak bamerah bibir. Isin jo rela dari Rky, sirihkan masak jo mufokat.

               Olun la bakalam
               Bulan lah gonok tigo puluh
               Olun dilihek la dimakan
               Raso la tibo dalam tubuh

Sobab dek baitu, kami ko banyak tadiri dari anak mudo matah nan indak tabiaso makan sirih. Nyampang sirih Rky kami cabiak, pinangnyo digotoktontu indak lo mako dimakan raso, indak rancak dipandang rupo. Sobab Rky kan mamandang kami bak pane dalam balukar, bak sicerak dipadang lalang, iko nan manggamang nan marusak di kami. sekian.

Laki-laki (3)

Maliek lurui batujuan, mamandang adat bajukalo. Kok lurui makanan tikak, balabe manahan cubo, bontuak dimakan siku-siku.
Bungkal gonok manahan asah, hukum adial manahan bandiang, kato bonar manahan likek, banamo jopuik jo antar basondi arak jo iriang.
Arak iriang sapanjang jalan, dombak dombai sapanjang lobuah, ogung calempong jadi topuang, sorak jo sorai jadi bungo.
Salotui bodial pusako, pusako pangulu dinagori masuak ka karong kampuang Rky. Kinilah duduak diate rumah, duduak diruang rumah godang cukuik jo ninik dengan mamak saroto ipar dengan bisan, dilengkapi dek nan mudo matah.
Adopun kamudian dari pado itu, sapihak dek kami nan datang ado mamogang pataruah jo amanah. Latasuruak tasirayo untuk maantar mairingkan marapulai naik karumah tanggonyo. Koma lah tibo kami disiko, tibo sarato jo adatnyo. Mahantar sampai kate rumah, baulur jawek  ambo jo Rky, batumpu tapak dengan mamak. Jikok dilihek simarapulai, dipandang anak daronyo nan bak parmato jo pangarang, bak cincin pulang kajari.

               Surang ikan surang kulari
               Samo sapukek kaduonyo
               Surang bulan surang matohari
               Samo bacahnyo kaduonyo

Pandang-pandanglah dek Rky daliak dan saka si marapulai : Urang mudo salendang dunia, duduk dikasur kabosaran, dilingkuang andam baliak bolak, longkok saroto pangiriangnyo, niniak mamak samo didalam.
Mamakai baju bolah buluh, siba batansi timbal baliak, longan bakotak bonang makas, solo manyolo bonang ome. Bacawek bajambuar suto, bapondiang mako bapilin, takonak sakin pangidam. Lokek salowar kipe duo Anggo, baturab duo ditongah, elo maelo pisak teorang, sajongkal pucuak robuangnyo.
Silaulah pulo anak daronyo : nan bak padi sironiak jintan, pane tibo dilingkuik-lingkuik, hujan datang dikokar-kokar, sabijo haram dek ayam, latande mako di koke. Dipakaisilah anak daro dilokekkan baju barelun nan baukir bagajah meno. Salendang kain kapunuik, obuaknyo katuar bakatuar. Badopak subang di pipi, badoriang golang ditangan, buatan tukang jolong pandai, kilek kamilek cahayonyo.
Dimaso sekarang kini, dihari sahari nangko, nak kami lotakkan boban nan bajujung, dibayiarkan utang tapabuek, disampaikan posan nan babao, padolah bdan kan sesonyo, yaitu adok kadiri marapulai :
nyampang kok tumbuh tongah rumah, kan jadi adat budi baiklah hendaknyo, kan tungkek pulo.
Kok elok rotak tangannyo, baolah manukuak jo manambah, bao manyisik jo mambilai. Kok elok ratak lidahnyo, kusuik baoklah manyalosai karuah baoklah manjoniahi, kamudiak nak sarontak galah, kahilir nak sarangkuh dayung, bajalan samo mairiang, baiyuran samo maisi.
Salapi nan dari pado itu. Ikolah ruponyo simarapulai, raso manetek niro pinang onta barayiar onta tido, nan bak alu patah patigo musim pabilo nan batawik.
Nyato ibarat padi salibu, awak tumbuh musim talampau, urek bagantuang kajarami, rangkiang tinggi nan ka diadang. Mohon ditarimo dek mamak nan disiko digonggam ditapak tangan, didalam adat jo pusako. Pulang bukan pulangkan baitu sajo pulang paek pulang sagirik, pulang dengan karanjangnyo, posan indak baturuikkan, pitaruah indak bauni, maaf dipinta banyak-banyak.

 Perempuan (3)

Salorong dibadan diri ambo nan bak ibarat urang mamanciang. Sodang dirintang air hilir, dalam dimabuak dek galombang, io dialun-alun buih, tali togang piapung hilang hilang kail disambar dek gurami.
Duduak takojuk tukang pancing, kail putui bonang la kusuik, kini manjolang bonang kakumpalan, kato dilotak dalam bari, bonar disimpan kalimbago, digonjuar rundiang sakutiko :
Dihari sahari nangko, dimaso sekarang kini ;

Jikok disulam disuji-suji
Bakilin sangkuik kain bantal
Jikok dikonang dikaji-kaji
Disobuik asal jo muasal

Tatikalo maso dahulunyo, katiko balun barbalun, bungo bolun bijo pun bolun, niat tasimpan dalam hati, io dihati ibu jo bapak.
Nan manjadi niat jo nosar, dimintak sungguh pado Allah, mamohon pado ilahi, kironyo dapek anak katurunan diwari nan kan mangawek, pusako nan kan batulung.

    Kok buliah anak laki-laki : Bareklah cincin dikalingking, kan panjopuik dagang nan jauh, kan panyonsong panggilan tibo, pambangkik batang tarondam palawan onjak rang didunia
    Kok biliah anak perempuan : ibarat bungo dihalaman limpape rumah nan godang, samarak anjuang paranginan acang-acang dalam nagori

Mako tibolah maso katikonyo, nan bak bidal-bidal rang kini, bak andai-andai rang  dahulu :

Ditobang batang talantak
Dikuduang sambilan jari
Barokat do’a jo pintak
Masonyo Allah kan mambori

Buliah anak perempuan, dari lahiar sari banamo, banamo : .........................
Lalu diinang jo diasuah, dijunjuang bagai mangkuto ditanai bagai gumalo, pamainan pagi jo potang

Dibalikan subang jo golang
Bagonto ome balope
Dari ketek kini lagodang
Sampai manjadi anak gadi

Lalu ditunjuk diajari, dididik adapt sopan santun, sacara urang basuami. Umur cukuik bilangan sudah. Kini sirihlah patuik naik junjungan.
Mako tarobiklah niat jo nosar, hondak maminang jo mangacak mancari judu tunangannyo. Dipikir-pikir didalam hati dipikir lalu dimonuangkan.
Pandang jauh dilayangkan, pandang dokek ditukikkan, nampak urang nan sapadan. Pandang lokek patuiklah sudah jatuah pilihan kek surang si….. rang namokan.
Urang barasal balimbago baso baik roman katuju, muluik mani paramah pulo.
Dek arok kek nan kan bulia, dek come di nan rugi mako ditingkeklah jonjang rang suku........... ditopiak malah bondualnyo.
Mamintak kek nan kan bulia, bakawaal kapado nan kiramat, mako Allah manggorakkan.

Batomu rue jo buku
Saukur batang kan junjungan
Pintak bulia kondak balaku
Sinen niat dilangsuangkan

Sepakat sagalo mamak, sasuai pulo jo baku, saizin datuak pangulu, dihadirkan sopia belahjan, dihimpun karong kampuang. Nan jauh dilope turuik, nan dokek makanan himbau, lalu dijopuik simarapulai, jopuik saroto jo adatnyo.
Labasulua matohari, bagalanggang mato nan banyak, kok olek lasaponuah rumah, mangucap syukur ibu jo bapak dek utang ola tabayirkan.
Madok kapado anak daro : ibarat robuang  jolong mambocuik, baumur bilangan hari, godang disiram ombun malam, batang gompar sambilu indak.
Urek olun mancokam tanah, pucuak olun mandapek angin, ontak pabilo kan basogar. Tapi kok untuang elok pamintaannyo, dek masin lidah junjungannyo, dek dingin tangan suaminyo, talakik robuang manjadi batuang.
Nyo baurek bagumpal godang, nyo babatang barue-rue, badaun rimbun jo rampak. Tabiang diagak jangan nyo runtuah, lurah mamuji kan lindungan, samantang tinggi diawan, pucuaknyo runduak ka bumi, manyilau tanah manggodangkan.
Dihari sahari nangko, hari elok katiko baik, ombak tonang angin salosai, hujan toduah kabuikpun torang. Kinilah marawah nan baturiah, kinilah padan nan baukur. Tibo dijonji ditoguhi, ikrar dimuliokan, mako timbang tarimo pado hari kini. Dek Rky lah manyorakkan kami tarimo jo hati suci, saroto muko nan joniah, ketek tapak tangan, nyiru kami tampuangkan.

Penyerahan Hidangan

Sungguhpun Rky surang nan taimbau dalam syariat jo hakikat atau disahirdengan bathin, samonyo didalam ampun.
Ampun jo maaf dipabanyak nan salah, dek rundiang banyak nan sosek, namun kito basifat gawal, Allah basifat qodin, jo parundingan Rky dijalang. Apolah rundiangnyo!
Pihak dihari sahari iko, entah hari ko nan elok, ontah katiko nan baik, sodang wakotu bungo kombang, ojuang balayir dimusimnyo, sawua tatogak angin tibo. Kok para undangan lah datang babondong, si pokok mananti jo basamo, jonang manatiang sangek suko, panawar sagalo rongga hati.
Tumbuh sarupo iko kini utang dek kami sipangkalan, iolah silang nan bapangkal, karojo nan bapokok, disadiokan minum jo makan. Manolah ruponyo :
Malumpek sabolah kaki
Mangganjak pasak diparan
Dihasilkan dek anak si laki-laki
Dimasak anak  perempuan

Apolah namonyo : Nasi nan sasuok, gulai nan sairi, air nan satitik. Nan bak pituah sagalo guru, adat sagalo datuak, adat limbago dalam olek mamakai si rajo jonang.
Tasobuik sirajo jonang : Tahu diereng dengan gendeng, tahu dicaka dengan kaik, mato nyolang talingo nyariang manjago lobiah dengan kurang.
Dek pandai jonang manatiang, nan tahu digarik dengan raso, la sadongar piring babunyi, iyo didalam padapuran. Ola ditengok la dipandang cukuik barisi gale jo pinggan, togak badiri bujang jo jonang.
Tangan manatiang karuang selo, takonak kapiah dikapalo, lokek disamping tonunan arab bugi makasar rang namokan.
Manatiang nasi dengan gulai, jawek bajawek cindonyo piring, lego balego susunan gulai nan bak santano fajar tabontang. Teko godang mamocah ruang, cangkir ketek babilang tangan, heranlah mato mamandangi umpamo ombak dilawiktan.
Pihak kapado susunannyo : ditongah awan ba jombo ditopi somuik bariring, nago bahoyak kiri jo kanan barisi longkok kasadonyo.
Lembak nan dari pado itu, aluran nasi nan katongah, jikok di inok dimonuangkan asal mulo dahulunyo. Padi sironak rambun tulang, tumbuh dilereng kadataran, dijomur dek puti lindung bulan.
Hari pane jomuar balingkuik, hari hujan jomuar bakokar mosiak nan bukan alang-alang, koriang dek sinar pane potang.
Lalu ditumbuk jomuar ka kincir, eten karonah bungo tanjuang iyo kalurah sungai joniah.
Kalau ditengok cindonyo kincir, air godang bondar batumbuk nan umpamo sianak roda, bapaliang tingka batingka, bunyi alu sahut-sahutan solo tingkah calempong jao.
Jomuar ditumbuak pantang basokam, diindang mako baata, ditampi mako badodak, putihnyo putiah bungo limau. Tatikalo maso dahulunyo : sagonggam bare ditanak ponuahlah kanca jo kuali.
Nan litak makan dhulu solo manyolo urang nan datang namun nasi kan luak tido.

Nak hilir kabatang hari
Nak mudik ka pauh rindang
Babelok jalan ka pariaman
Minumlah air nan taisi
Makanlah nasi nan tahidang
Nak sonang hati sipangkalan

La basodakahan saisi rumah iko, adat lumpek basitumpu concang balandasan, kato batiboon kek sianu batiboonnyo.

Penerimaan Hidangan

Salorong hidangan nan lakatongah, elok nan susunannyo nan bak sirih, elok otoknyo nan bak gambir, gamak sodang kacak tabao, tampan ado lelo dipakai, indak bacacek jo bacotar,ola lah cukuik samparono.
Taniat dihati nak mamuji, taragak nak manyanjuangnyo, taraso kolu lidah manyobuik, pocah makrifat dek tuahnyo, jo bathin sajo disyukuri.
Apolah manjadi pintak jo pintoRky tadi : Air ta isi mintak diminum, nasi tahidang mintak dimakan kapado kito nan duduak saedaran, togak sapambatang dirumah iko.
Dek kami indak baapo de Rky :
Dipandang somak rumpun buluah
Dirambah makonyo torang
Solang batanak kami lai omuah
Kok kunun mamakan nan tahidang
Tapi ulah dek togak baparintang, ulah dek duduak bapamainan, rintang dek baso si pangkalan, mako lah sojuak kami sabolun minum, lah konyang sabolun makan.
Kini go, kok kilek la barapi-api, potui la badontum-dontum, gabak dihulu la manopi kan ujan juo nyo kironyo. Kok iyo lai kan hujan nak diraoknyo kito sabalik, sarelun riak jo galombang, samo-samo kito makan. Apo sobab dek baitu :

Rang guguak poi kapokan
Mahilir manojun lobuah
Bakain basaruang batiak
Senen duduak kami kan makan
Bapikir kami kan batambah
Kok baetong suok turun naik

Kok iyo lai kan samo makan :

Tobal bakabuik cindonyo asok
Urang mamorun rantiang aro
Kok iyo hidangan kan di santok
Tolong tunjukkan ikuar kapalonyo

Dibaruah air katiagan
Pimping sarumpun disubarang
Ambiak air basuah lah tangan
Kami mairing dibalakang

Mintak Do’a

Ampunlah ambo dek pangulu, pangulu banyak nan sati, rang godang banyak nan batuah, bago marusuak tompek lalu lalu nan dituju ka itu juo
Tatikalo sumur kan dikali, samulo rantiang kan dipatah, pangulu badiri dinagori mambangun adat jo pusako, ma adokan bari jo balabeh manyusun cupak dengan gantang
Dek adat nan mamakai pusako tinggal maronggoi, cupak tatogak utang ma isi. Sungguh pun iyo nan sagonok itu, dek kami silang nan bapangkal, karojo nan bapokok, dicarilah bulek nan sagolek picak nan salayang
Bulek ladapek digolekkan, picak lah buliah dilayangkan, mako diambiak api saroto bakar kumonyan. Asok mandulang ka udaro, bau lah tinggal saisi rumahiko. Apokah nan manjadi parniatan kami dari siko :

1. ........  2. ......... 3. .......... 4......... 5. ...........

Concang kan iyo sagaragai, kapalkan iyo salabuhan. Kini tampaknyo : kok adat la tabatu intan kabawahnyo takosiak bulan. Syarak lah ujudullah katenyo  la ta ombun jantan.
Sauukur hukum sasuai, sadundun adat jo agamo, adat kawi sayarak lah lazim, undang manuruik dibalakang. Kini nan duo bola pihaknampaknyo : bakobek jo akad nikah, ba buhul moti ijab kabul, babuhul sintak jo bagian kan tanggal raso tak mungkin, ontah kok Allah manggorakkan. Kito mintak kan rasokinyo murah, umurnyo panjang, untuang nyo gantuang bagantuang bak aur dengan tobiang, bak tangguak luluah jo bingkai, bak kuciang jatuah jo kombuik.
Ibarat urang manggale, taboli kek nan murah, tajual di nan mahal, sailiar samusiak, saiyo sakato.
Dek sorik batomu larang basuo sarupo iko, takonang lo nan mati lamo nan mati baru, nan indak takonang tacinto lai, nan dapek dek do’a sipokah  nak samo disom bulo. Kok borek dapek ringan, sompik dapek lapang. Jadi nampaknyo sakali marongkuh dayung duo tigo pulau talampau, sakali mambukak puro duo tigo utang lansai, nak mintak dibacokan..................................

 Mohon Pulang

Jikok diagak dikonang-konang, ditimbang sakaki patuik, manakur ambo ka bumi, maningada ambo kalangik, dek kito kini la ompek adat nan bapakai.
Partamo sombah manyombah, kaduo baso jo basi, katigo sirih jo pinang, kaompek cukuik minum jo makan, elok lenggang diari pane, maradeso diporuik konyang, senen tabukak kiro-kiro.
Kok makan lah samparono konyang, minumlah samporono pueh. Kini air barensuik jadi darah, nasi baransuar jadi daging, syukur nikmat pado Allah, puji kek Rky tatonggoknyo.
Walau diawal kalam tadi, dek kato ambo nan sapatah, dek sombah ambo nan sabari, muluik tatabuar kek nan banyak, sombah tasera din nan rami.
Ruponyo ambo lai bakato di nan lai. Ado tarocak dilimbago, tatonggok dipusako. Manobang lai dipangkal, manjuluak lai dibuah, bakato lai di nan bonar lokek lah tuah di nan banyak.
Tapi kok bakato kek nan tidak, malu tatumpah pado ambo, arang tacuriang pado koniang, bakipe poluah kadado, bakojar darah kajantuang, buruak barito di nagori.
Kamujuran dek silang nan bapangkal namonyo : Jauh disoru olah datang, dokek dipanggil olah ibosamo barhadir dirumah godang iko.
Kamujuran dek kami nan datang :
Datangla dibukakkan pintu, duduak la di bontangkan lapiak, awi labatuangkan air, pn lapar la baidangkan nas. Indak upek nan kan tumbuh, ontah kok puji nan kan bulia.
Jadi  kami kini bak ibarat buruang pipi ma Rky. Taorbang babegar di udaro, ba lunta-lunta jo kabuik, babentan-bentan jo awan, pueh malayang nyo malayok, sudah maninggi nyo marondah, tarobang kapadang ribu-ribu, iyo karimbo nan satumpak.
Sodang mamakan buah rumpuik, poruik konyang awi pun tibo, lalu diisok ombun nan satitiak, sojuak nan bukan alang-alang bak apne ditimpo ronyai. Mambayang-bayang kamuko, mancayo kautak bonak, soanng hati bukan kapalang, pariso maruang tubuh, sehat anggota katujuahnyo. Dek lasuda minum jo makan, makosuik bonar dalam hati, nak manjolang pinang sabatang, manuruik sarang batinggalkan, pulang kaasal dahulunyo.
Apo nan manjadi kasamparonoan sombah : riak la sampai katobiang, runuik la sampai ka bakal, balayir la sampai ka pulau, bajalan la sampai ka bate.
Kok ta gonang la ba pambatang, ma hilir la kamuaro, nan dimakosuik ola samapi, nan diamalkan pun lah pocah.kok duduak nak maurak selo, togak nak maayunkan langkah, bagonjuar suruik ka pangkalan, sabondong pulang karumah masing-masing.
Izin jo rela kami mintak, mohon dilope jo hati suci, saroto muko nan joniah.

Si upiak siti Rahimah
Mambao parian pulai poi
Guluang lapiak sapululah rima
Kami baliak hanyo lai.

Perbendaharaan Sombah

Dek tinggi batang lamo kan roreh, dek panjang jalan lambek kan sampai. Agak talalai ambo saketek.
Palupuh batang malapari
Pucuak manimpo akar jumbai
Dibaok rang ka batipuh
Sungguhpun ambo togak badiri
Bukanlah urang codiak pandai
Ujudnyo duduak nan basimpuh

Kasa ombun kasa baludu
Salilik bajaik topi
Baturap jo bonang merah
La tasampai di pagaran
Mintak ampun ambo ka pangulu
Nan saririk duduak ditopi
Saedaran madok ka tongah
Jo sombah dimuliokan

Pisau sirawik ulu sonsang
Saruangnyo tore kayu jati
Ulunyo pangkal batang tomat
Diambiak paracik buah
Takuik gontar ambo mambilang
Pangulu banyak nan sati
Tuak ongku banyak nan kiramat

Rang godang banyak nan batuah
Mulonyo jalo diserakkan
Konai kulari nan bapalun
Mulonyo kato disombahkan
Manyusun jari mintak ampun

Mintak ampun ambo kapado ninik mamak. Nan godang bosar batuah, urek tunggang pucuak nan bulek dinagori. Dahan rampak daun nan rimbun dipusakoputiak lobek buah nan ranum makanan urang sa alamnyo.

Kajirat tarobang ramo-ramo
Hinggok mancongkam lidi sogar
Badobuak jatua katanah
Ketek indak sobuik namo
Godang indak sobuik golar
Sombah jatuah ditongah-tongah
Kamano galah dirobahkan
Kasomak jalan batimbal
Konailah balam lalu mati
Kamano sombah di sombahkan
Iyo kapihak urang sipangkal
Rela jo salam mairingi.

Dihari sahari iko, hari elok katiko baik, ombak tonang angin salosai, hujan todua kabuikpun torang.
Kinilah marawah nan baturiah, kinilah padam nan baukur. Tibo dijonji ditoguhi, ikrar dimuliokan, mako datang kami dek bajopuik. Ola tibo sapanjang adat la taduduak diate rumah nan godang.
Rumah nan indak godang amek, rumah godang sambilan ruang, 99 balobeknyo. Salojang ludo balari, sapokiak bundo maimbau, salitak kuciang malumpek, salayang kabin malayok.
Sondi banamo sondi adat, tiang banamo kan sandaran, pancuang turang olang kan tarobang, cucurannyo lobah kan inggok. Gonjongnyo robuang mambocuik timah mamutia diatenyo. Paran gambar si ular ngiang, batata bamego-mego, ukir banamo batang padi, akar cino ragam tak sudah, rawik jadi tukang tabunuh, indak dapek maniru lai.
Lantai datar bak lantai kulik, dinding licin bak dinding kaco, ka ujung sarambi popek ka tongah rajo babandiang.
Rangkiangnyo 3 jajar : ditongah si bayau-bayau balanjuang sapanjang musim. Dikidal si tangkal lapar tompek batenggang urang kampuang. Ditopi sitinjau lawik panyapo dagang ta pasak.
Dek urang pihak disiko, urang babudi elok baso, dalam babudi baradat pulo. Mako diconcangkanlah carano baso, ditinggalkan medan nan bapaneh manuju medan nan balinduang.

Dibasuah kaki jo cibuak godang, cibuaknyo rajo rajo manonggak, salalai disiran air la sojuak la sampai rongga hati.
Kan iyo dek elok tamu dibao naik, mulio undangan di bao duduk, la taduduak ditongah rumah.
La duduak ditonga rumah diate lapiak ampar putih, hitam basusun bakuliling. Tikarnyo pandan manjulito, dianyam anak randai gadi, bapakai sakali bolun kinilah baru tabontangnyo.
Tak pueh mato mamandang, langgaman adat pariasan, talabuah tirai langik-langik, tirai suto panjang sambilan. Tiang bapalik kain kuniang kasa ome ka omesan.
Mamandang lalu ka paserak cindo caromin lapi balap takonak dian jo palito, toranglah malam bak dibasuah, kojar bakojar cahanyonyo, bendang nan bukan alang-alang. Kalau dituruik jo padanan, tando dibaliak di karisaibatomu adat jo padanan nan mamang di nan pandai.
Barakik biduak talenggang – karucuik jo saliguri
Dalam rumik Rky batenggang – tando bamain akal budi
Salapi nan dari pado itu : adat dunio bak mambale, syari’at palu mamalu, madok kek kami bulo kini :
Pihak di kami ko nan datang, nan duduak ditanai lantaisalingkar bari di topi, sabanjar bari ditongah, dek bacampuar tuo jo mudo, nan tuo baknyo tasilap, nan mudo kok nyo tasosak mungkin basuo : salah cotok malotiangkan, salah hawai maompekan, salah muluik mautangkan.
Takirai langkah kan masuak, takerah lenggang kaluar, tasingik budi di nan rami. Nyampang tasuo nan bak itu :
Mambayiar kami ponuah-ponuah, mamintak kurang banyak-banyak.
Dilahir kami mohon ma’af, di bathin ampun dimintak. Bunyi nak samo didongar, rupo nak samo dilihek, balabuah Rky jo bicaro., rundiang dikorek dibukunyo.sekian.

Perbendaharaan ( Mengurung)

Hari lah laruik tongah malam, bulan tidak bintang pun tido, dek jauh nan kan dijalang, jarak panjang nan kan ditompuah, sodangkan biasonyo rimbo bajariang, padang ba panyongek, luak babuayo, iko nan manggamang marusua hari kami.
Jauh lah indak tajalang, tinggi kok indak tapanjek, kok indak sampai ka rumah masing-masing baamalan kito disiko dulu :

Jiluang tumbuah diparak
Tumbuh sarumpun jo batang puar
Jonjang patah pintu bapasak
Kamano Rky kan Kaluar
(melepasakan)

Rabawa jo Koto tinggi
Manojun torui ikur koto
Kato sapatah palang ngkai
Jo muluik mani turun tanggo

La ponek kami dek babansi
Bansi tasandar di pamantang
Laponek kami dek mananti
Mangapo Rky. Lambek datang

Dimalam samalam nangko
Ontah bulan ko nan torang
Ontah kok bintang nan mancayo
Godang ati indak tabedo
Kok nan dinanti olah datang
Nan dijopuik la tabao

Ramo-ramo di padalaman
Patah sayok tarobang bonti
Manukik kadalam ladang
Usah lamo togak dilaman
Ambiak cibuak basuahlah kaki
Naik kate rumah godang

· Kato nan indak mananti jawab, gayuang nan usah Rky sambuik, jo karojo sajo Rky iringkan
· Dek ma’af godang faedah, dek rela godang manfa’at barela-rela sajo kito disiko kito lukukan katanah lakang, dianyuikkan ka lawik lope.